Ի՞նչ ես գազազում, ի՛մ վիրավոր սիրտ,
Որ գազազում ես, ի՞նչ պիտի անես.
Աշխարհը իրեն ճամփով կընթանա,
Դո՛ւ խեղճ, դո՛ւ անզոր, ի՞նչ պիտի անես:
Որ գազազում ես, ի՞նչ պիտի անես.
Աշխարհը իրեն ճամփով կընթանա,
Դո՛ւ խեղճ, դո՛ւ անզոր, ի՞նչ պիտի անես:
Մարդն այս աշխարհում, ինչպես մի թռչուն
Անդուռ ու անել մեծ վանդակի մեջ.-
Սի՛րտ իմ, գազազիս ի՞նչ պիտի անես
Անդուռ ու անել այս վանդակի մեջ:
Անդուռ ու անել մեծ վանդակի մեջ.-
Սի՛րտ իմ, գազազիս ի՞նչ պիտի անես
Անդուռ ու անել այս վանդակի մեջ:
Մարդ ծընված օրից գերեզմանի հետ
Շղթայված է պիրկ, ո՛ւր էլ որ երթա,-
Սի՛րտ իմ, գազազիս ի՞նչ պիտի անես
Ու՞ր պիտի թըռնիս՝ թևերիդ շըղթա:
Շղթայված է պիրկ, ո՛ւր էլ որ երթա,-
Սի՛րտ իմ, գազազիս ի՞նչ պիտի անես
Ու՞ր պիտի թըռնիս՝ թևերիդ շըղթա:
Տոկա՛, համբերիր, ի՛մ վիրավոր սիրտ,
Վըճիտ հայացքով աշխարհին նայի՛ր,
Աշխարհը իրեն ճամփով կընթանա,
Է՜յ, վիրավոր սի՛րտ, դու մի՛ գազազիր…
Վըճիտ հայացքով աշխարհին նայի՛ր,
Աշխարհը իրեն ճամփով կընթանա,
Է՜յ, վիրավոր սի՛րտ, դու մի՛ գազազիր…
(Ավետիք Իսահակյան )
Комментарии
Отправить комментарий